عصابة البانضية .. استغلال غطاء “حرية التعبير” من أجل النصب والاحتيال

شكون فينا لي متفرجش ففيلم “البانضية” ديال الممثل والمخرج سعيد الناصيري، لي كايجسد القصة ديال القطاطعي لي قلب طوبيسات كازا سفاها على علاها بالتحرميات ديالو وشبع التسياق فجيوب عباد الله.

وشكون قال أنلقاو بحال هاد البانضي فالواقع المغربي؟ كاينين ومنهم بزاف، غير هو البانضية ديالنا دايرين فيها مطورين وعايقين وبلي مكايهمهمش الفلوس.

من بين هاد “البانضية”، زكرياء المومني الملقب بـ “مجينينة” ومن لا يعرفه، بطل العالم فالسلوكية والكذوب لي كايطلقهم على الشعب المغربي، بسبب رفض المغرب الخضوع لابتزازه فمبلغ 6 دالمليار كان ناوي إدير بها لاصال ديال البوكس في العاصمة الفرنسية باريس.

مجينينة من بعد ما فشل فالمخطط ديالو، تعدا على مرتو بالعصا وخوا فيها الغدايد ديال 6 دالمليار، هادشي لي خلق ليه مشاكل مع السلطات الفرنسية من بعد ما شكات به مرتو لي كان كايخونها للبوليس فشهر مارس 2016، وهادشي خلا “البانضي” إهرب لكندا وطلب اللجوء السياسي واخا ماعندوش الشروط ديالو.

البانضي الثاني، هو المتطرف محمد حاجب الملقب بولد الهاشمية، هاد الإرهابي عدو الله، وكيف اللول تا هو مهووس ومريض بالشعب المغربي، وكايستاغل موقع “اليوتيوب” باش انشر السموم ديالو.

الإرهابي حاجب كان مشا ف 2009 لباكستان اتعلم حرفة الإرهاب، ومن تما صيفتوه لألمانيا ومن وراها قرر ارجع المغرب، وملي اوصل تحكم عليه ب 7 سنين بتهمة الإرهاب، وفالحبس تلاقا مع عشرانو من القاعدة وحاول احرضهم على أعمال الشغب والعنف.

البانضية لوخرين، هما الكوبل المحترف فالاحتيال والنصب، دنيا موستاسليم وعدنان الفيلالي الملقبين بـ”فليفلة ووالمافيوزي”، وبحال جوج لوخرين تا هما مهووسين بالشعب المغربي، ودارو شركة فالصين للاستيراد والتصدير المونيكات الجنسية والهواتف المزورة.

هاد الكوبل “البانضي”، كان كايستغل حسابات مزورة فالفيسبوك وانستغرام باش انصب على المتابعين ديالهم وباش انشرو فيديوهات جنسية ويبيعو المنتوجات المزورة.

وبحال العصابات الإجرامية هاد “البانضية” كايتافقو بناتهم باش اديرو هجوم منسق، فمواضيع كايختاروها بعناية، ولكن حيث الكذوب عمرهم قصير الحقيقة ديالهم كاتبان دغيا.